എണ്ണ - പ്രകൃതി വാതക പ്രദർശനം അബുദാബിയിൽ ആരംഭിച്ചു

അബുദാബി:എണ്ണ,പ്രകൃതി വാതക മേഖലകളിലെ നൂതന ആശയങ്ങളും സേവനങ്ങളുമായി രാജ്യാന്തര പെട്രോളിയം പ്രദർശനവും സമ്മേളനവും (അഡിപെക്) അബുദാബിയിൽ ആരംഭിച്ചു.സമീപകാലത്ത് രാജ്യാന്തര എണ്ണ വിതരണ കേന്ദ്രങ്ങൾക്കും കപ്പലുകൾക്കും നേരെയുണ്ടായ ആക്രമണ പശ്ചാത്തലത്തിൽ‍ സമ്മേളനത്തിന് വന്‍ പ്രാധാന്യമാണു കല്‍പിക്കുന്നത്.കടലിലെയും കരയിലെയും എണ്ണ ഗവേഷണം,ഖനനം, വിതരണം,ശുദ്ധീകരണം,സുരക്ഷ തുടങ്ങിയ മേഖലകളില്‍ ഊന്നല്‍ നല്‍കികൊണ്ടായിരിയ്ക്കും പ്രദർശനം നടക്കുക.ലോക ഊര്‍ജ തലസ്ഥാനമെന്ന ലക്ഷ്യത്തിലേക്കുള്ള പാതയിലാണ് ഇന്ത്യയെന്നും ഈ രംഗത്തെ നിക്ഷേപത്തിന് ഏറ്റവും അനുയോജ്യമായ മറ്റൊരു രാജ്യമില്ലെന്നും കേന്ദ്ര പെട്രോളിയം,പ്രകൃതിവാതക മന്ത്രി ധർമേന്ദ്ര പ്രധാൻ പറഞ്ഞു.അബുദാബിയില്‍ ഇന്നലെ ആരംഭിച്ച രാജ്യാന്തര പെട്രോളിയം പ്രദര്‍ശനത്തിലെ ഉദ്ഘാടന സെഷനില്‍ സംസാരിക്കുകയായിരുന്നു മന്ത്രി.എണ്ണ,വാതക മേഖലയുമായി ബന്ധപ്പെട്ട് വിദഗ്ധരുടെ നേതൃത്വത്തിൽ വിവിധ വിഷയങ്ങളിലായി 160 സമ്മേളനവും നടക്കുണ്ട്.എണ്ണ,വാതക,നിർമാണ മേഖലയിലെ യന്ത്രങ്ങളും അനുബന്ധ ഉപകരണങ്ങളും സേവനങ്ങളുമാണ് പ്രധാനമായും പ്രദര്‍ശനത്തിലുള്ളത്.അബുദാബി ദേശീയ പ്രദർശന നഗരിയിലെ ഇന്ത്യാ പവിലിയൻ കേന്ദ്ര പെട്രോളിയം,പ്രകൃതിവാതക മന്ത്രി ധർമേന്ദ്ര പ്രധാൻ ഉദ്ഘാടനം ചെയ്തു.ചടങ്ങിൽ ഇന്ത്യൻ സ്ഥാനപതി പവന്‍ കപൂറും മറ്റു ഉന്നത ഉദ്യോഗസ്ഥരും സന്നിഹിതരായിരുന്നു.

4 April 2025