കുവൈത്ത് സിറ്റിയുടെ മുകഛായ മാറ്റാൻ വികസനപദ്ധതി

കുവൈത്ത് സിറ്റി:കുവൈത്ത് സിറ്റിയുടെ മുകഛായ മാറ്റാൻ പദ്ധതി. കുവൈത്ത് സിറ്റി അർബൻ പ്ലാൻ പ്രൊജക്ട്-2030 എന്ന് പേരിട്ടിരിക്കുന്ന പദ്ധതി പൂർത്തിയാകുന്നതോടെ മിർഗാബ് മുതൽ മാലിയ വരെ നീണ്ടുനിൽക്കുന്ന കുവൈത്ത് സിറ്റിയുടെ മുഖച്ഛായ തന്നെയാണ് മാറാൻ പോകുന്നത്.താമസമേഖലയും വാണിജ്യമേഖലയുമൊക്കെ ചേർന്നുള്ള ബഹുമുഖ പദ്ധതികളാകും ഇതിലൂടെ പൂർത്തിയാക്കുക.നിർദിഷ്ട മെട്രോ റെയിലുമായി ബന്ധപ്പെട്ട സ്റ്റേഷനുകൾ,നവീകരിക്കുന്ന പൊതുഗതാഗത സംവിധാനങ്ങൾ,വാണിജ്യസ്ഥാപനങ്ങൾ,ആഢംബര ഹോട്ടൽ അപ്പാർട്മെന്റുകൾ,റിക്രിയേഷൻ കേന്ദ്രങ്ങൾ,പൊതുസേവന സംവിധാനങ്ങൾ തുടങ്ങി നിരവധി ആധുനിക സൗകര്യങ്ങൾ ആണ് ഒരുക്കുന്നത്.ഒപ്പം പൈതൃകങ്ങൾ കാത്തുസൂക്ഷിക്കുന്ന സംവിധാനങ്ങളും ക്രമീകരിക്കും.

അബ്ദുല്ല സ്ട്രീറ്റ്,മുബാറക് സ്ട്രീറ്റ്,മുബാറൽ അൽ കബീർ സ്ട്രീറ്റ്,ഖാലിദ് ബിൻ അൽ വലീദ് സ്ട്രീറ്റ്,ജാബർ അൽ മുബാറക് സ്ട്രീറ്റ്,ഫഹദ് അൽ സാലെം സ്ട്രീറ്റ് എന്നിവയെല്ലാം നവീകരിക്കും.വികസനം ജനങ്ങളിൽ എത്തിക്കുക എന്ന ലക്ഷ്യത്തോടെ സമഗ്ര പദ്ധതികളാണ് ആവിഷ്കരിക്കുന്നതെന്ന് അധികൃതർ വ്യക്തമാക്കി.സാമൂഹിക-സാമ്പത്തിക രംഗത്തെ കാലാനുസൃത മാറ്റങ്ങൾ അനുഭവവേദ്യമാക്കുന്നതിന് നഗരവൽക്കരണം ത്വരിതപ്പെടുത്തേണ്ടതുണ്ടെന്നാണ് വിലയിരുത്തൽ.അതിനനുസരിച്ചാണ് കുവൈത്ത് സിറ്റിയുടെ മുഖഛായ മാറ്റുന്നതിനുള്ള പദ്ധതികളും.സ്വകാര്യമേഖലയുടെ പങ്കാളിത്തത്തോട് കൂടിയായിരിക്കും പദ്ധതികൾ നടപ്പാക്കുക.

4 April 2025