175 ലക്ഷം ഇന്ത്യക്കാർ പ്രവാസികൾ

ന്യൂഡൽഹി: ഇന്ത്യയിൽനിന്നുള്ള 175 ലക്ഷം ആളുകൾ വിദേശത്ത് ജോലി ചെയ്യുന്നതായി ഐക്യരാഷ്ട്ര സഭയുടെ റിപ്പോർട്ട്. 1990ൽ 66 ലക്ഷം ആളുകളാണ് വിദേശത്ത് ജോലി ചെയ്തിരുന്നതെങ്കിൽ 2019 ആയപ്പോഴേക്ക് 175 ലക്ഷം ഇന്ത്യക്കാർ വിദേശത്തേക്ക് തൊഴിൽ തേടി കുടിയേറിയതായി ഐക്യരാഷ്ട്ര സഭ പുറത്തുവിട്ട ' യുണൈറ്റഡ് നേഷൻസ് ഇന്റർനാഷ്ണൽ മൈഗ്രന്റ്സ് സ്റ്റോക്ക് 2019 ഡേറ്റ'യിലാണ് ഇക്കാര്യം വ്യക്തമാക്കിയിരിക്കുന്നത്.
ഐക്യരാഷ്ട്ര സഭയുടെ സാമൂഹിക സാമ്പത്തിക കാര്യ വിഭാഗത്തിനു കീഴിലുള്ള പോപ്പുലേഷൻ ഡിവിഷനാണ് (പോപ്പുലേഷൻ ഡിവിഷൻ) റിപ്പോർട്ട് പുറത്തുവിട്ടിരിക്കുന്നത്. സെൻസസിലൂടെ ലഭിച്ച വിവരങ്ങളുടെ അടിസ്ഥാനത്തിലാണ് റിപ്പോർട്ട് തയ്യാറാക്കിയിരിക്കുന്നത്.

അന്താരാഷ്ട്ര തലത്തിൽ 2,720 ലക്ഷം കുടിയേറ്റക്കാരാണുള്ളത്. അതിൽ 175 ലക്ഷം പേർ ഇന്ത്യയിൽനിന്നുള്ളവരാണ്. ഇന്ത്യയിൽനിന്നും തൊഴിൽ തേടിയുള്ള കുടിയേറ്റം വർദ്ധിച്ചുകൊണ്ടിരിക്കുകയാണെന്ന് ഐകാര്യരാഷ്ട്ര സഭയുടെ റിപ്പോർട്ട് വ്യക്തമാക്കുന്നു. അതേസമയം, കഴിഞ്ഞ 30 വർഷത്തിനിടെ ഇന്ത്യക്കാർ കുടിയേറ്റത്തിനായി തെരഞ്ഞെടുക്കുന്ന സ്ഥലങ്ങളുടെ കാര്യത്തിൽ മാറ്റം ഉണ്ടായിട്ടുണ്ട്.

20 April 2024