കുവൈറ്റിൽ വിദേശികളെ കാത്ത് കടുത്ത നിയന്ത്രണങ്ങൾ

കുവൈറ്റ് സിറ്റി: കുവൈറ്റിൽ വിദേശികളെ കാത്ത് കടുത്ത നിയന്ത്രണങ്ങൾ.വർധിച്ചു വരുന്ന വിദേശികളുടെ ജനസംഖ്യ മൂലം നേരിടുന്ന സാമൂഹിക പ്രതിസന്ധി പരിഹരിക്കുന്നതിന് വിവിധ മേഖലകളിൽ നിന്നുയരുന്ന കടുത്ത സമ്മർദ്ദം സർക്കാരിനെ പ്രതിസന്ധിയിലാക്കിയിരിക്കുകയാണ്.ഈ പശ്ചാത്തലത്തിലാണ് വിദേശികളുടെ കുടുംബ വിസ ലഭിക്കുന്നതിനുള്ള കുറഞ്ഞ ശമ്പള പരിധി 500 ദിനാറായി വർധിപ്പിച്ചത്.വർധിച്ചു വരുന്ന വിദേശികളുടെ എണ്ണം നിയന്ത്രിക്കുന്നതിന്റെ ഭാഗമായി കൂടുതൽ കടുത്ത നടപടികൾ സർക്കാർ സ്വീകരിക്കുമെന്നാണ് റിപ്പോർട്ട്.വിദേശികളുടെ സേവനങ്ങൾക്ക് ഈടാക്കുന്ന നിലവിലെ നിരക്ക് മറ്റു ഗൾഫ് രാജ്യങ്ങളുമായി താരതമ്യം ചെയ്യുമ്പോൾ വളരെ കുറവാണെന്നും റിപ്പോർട്ടിൽ വ്യക്തമാക്കുന്നുണ്ട്.കൂടാതെ വ്യാജ വിസ മാഫിയകളെ തടയുന്നതിനുള്ള നടപടി ക്രമങ്ങൾ അടുത്ത വർഷാരംഭത്തിൽ തന്നെ ആരംഭിക്കുമെന്നും എല്ലാത്തരം എൻട്രി വിസകളുടെയും രൂപത്തിൽ മാറ്റംവരുത്തി,വ്യാജ വിസ നിർമിക്കാൻ പറ്റാത്ത വിധത്തിലുള്ള സംവിധാനങ്ങളും നടപ്പിലാക്കുമെന്നും സർക്കാർ വൃത്തങ്ങളെ ഉദ്ധരിച്ചുള്ള പ്രാദേശിക റിപ്പോർട്ടുകൾ പറയുന്നു.

21 May 2025